2019上半年10款必买游戏！

新一年又嚟喇，唔知大家上年玩过几多只好 game，又或者中过几多只伏呢？不过就算中哂伏都已经过咗去，我哋一齐睇下今年上半年有咩好 game 啦！

1. New Super Mario Bros. U Deluxe

推出平台：Switch
推出日期：1 月 11 日

挂住“ Switch 第一只 Super Mario Bros. ”衔头已经足以令大家狗冲啦！应该冇乜人唔知点玩㗎啦，呢只最重要系抵玩，一只 game 收录哂《 New Super Mario Bros. U 》同《 New Super Luigi U 》，简直就系“双 CD 单碟价”，好难唔买啰！

2. Biohazard RE：2

推出平台：PS4、Xbox One、PC
推出日期：1 月 25 日

当大家成日笑 CAPCOM 炒冷饭， CAPCOM 就话畀你听炒冷饭都有分系普通炒饭定黄金炒饭，而呢只绝对系黄金炒饭！与其话佢系 Remake ，不如话佢系 base on 旧慨 idea 去做过只新 game ，成个画面都系整容级慨改变， Bio fans 绝对唔可以错过。

3. Kingdom Hearts III

推出平台：PS4、Xbox One
推出日期：1 月 25 日（日文版）、1 月 29 日（英文版）

Disney 角色晒冷作，相信剩系呢个原因已经引到唔少人买。丰富慨剧情、大量受欢迎慨角色、超长慨游玩时间，绝对系值回票价！不过要提提你，喺呢个系列扣返合辑总共有 11 只 game，啲故仔全部有关联，所以如果一只都冇玩过，又想玩呢集慨话，可能要事先上网睇下片、做下功课先。

4. Jump Force

推出平台：PS4、Xbox One、PC
推出日期：2 月 14 日

日本 Jump 周刊 50 周年企划之一，一款拥有大量 Jump 旗下受欢迎漫画角色例如悟空、星矢、鸣门、路飞、拳四郎等慨格斗 game ，总有一个角色系你钟意。不过留意返格斗 game 真系唔系人人啱玩，唔好为钟意慨角色而一时冲动！

5. Anthem

推出平台：PS4、Xbox One、PC
推出日期：2 月 22 日

经历咗《 Mass Effect: Andromeda 》慨角色崩坏（啲角色会斗鸡㗎！）之后，相信 BioWare 会学精，之前慨 alpha test 玩过慨人都系大赞，仲要有主流慨 4 人组队出战，钟意玩 TPS 游戏慨玩家千祈唔好见佢系新 title 就 miss 咗。

6. Devil May Cry V

推出平台：PS4、Xbox One、PC
推出日期：3 月 8 日

事隔 10 年，正传终于再出续作，唔少 fans 已经等到颈都长埋。不过最吸睛慨相信唔系咩新系统、新角色，而系嗰三个几万蚊港纸慨终极限定版，如果你自称忠粉慨话冇理由唔买啰 ww！

7. 超级机器人大战 T

推出平台：PS4、Switch
推出日期：3 月 20 日

虽然成日都话而家新慨机战边买得落手，但点都仲系有一班 fans 支持（好多都买完冇玩㗎 ww ），加上系 Switch 首只机战，亦有一啲熟悉慨 title，如果都跳咗好多集冇玩慨朋友不妨留意下。

8. 只狼：暗影双死

推出平台：PS4、Xbox One、PC
推出日期：3 月 22 日

呢只 game 就系由《 Dark Soul 》、《 Bloodborne 》慨开发商开发，睇到呢两个名已经明哂。冇错！佢就系披住日本武士背景慨 Dark Soul ，喺东京游戏展 2018 慨现场试玩只系得少数人成功通关，如果你就系嗰班钟意自虐慨玩家，唔使谂啦，买啦！

9. Bum Simulator

推出平台：PC
推出日期：3 月 30 日

模拟 XX 从来都有捧场客，模拟乞衣呢个 idea 更加够爆，无论系喺垃圾筒揾嘢食、定系执纸皮用嚟做床玩家都会体验到，原本系预定 2018 年 9 月推出，推迟到 2018 年 12 月，再推迟到今年 3 月，希望唔好再 delay 啦。

10. Crash Team Racing Nitro-Fueled

推出平台：PS4、Switch、PC
推出日期：6 月 21 日

开亲 Party 唔系孖车、孖车、就系孖车，唔系话唔好玩，但都想换下其他角色、换下其他赛道慨，今年 6 月终于可以换一换喇， 1999 年古惑狼赛车慨重制版，当年已经好受欢迎，之前公布嗰阵亦都有几高慨讨论度，应该唔会伏挂。

戴返个头盔先，我觉得必买慨唔代表你一定有兴趣， Game 慨嘢最紧要系自己啱玩，意见慨嘢只系参考，可能人哋觉得伏你会觉得好玩呢。