2018年游戏界回顾（下）腾讯连番出事、Steam地位动摇！？
《 2018 年游戏界回顾（上）》就讲咗几款未达期望慨游戏大作，呢篇细佬决定就住四间游戏厂及平台——腾讯、 Epic Games 、 Steam 同 Blizzard 写下回顾。
中国政府收紧游戏审批，腾讯连番受挫！
如果大家有紧贴中国国情就会知如果一款游戏要喺中国推出，就要经过政府审批，唔可以含有“不和谐元素”，仲要加返啲“中国特色”，所以如果你冇将只 game 俾中国慨游戏公司代理慨话，基本上系冇可能喺中国上架。腾讯近年藉呢个理由已经投资咗唔少游戏开发公司（实际上系入股，但同收购冇分别），同过 Valve 倾合作同入股，但始终倾唔掂数，喺 2017 年革新旧慨腾讯游戏平台，推出全新慨 Wegame 平台。
喺 2017 年，腾讯手执全球最多人玩慨手游《传说对决》、代理到讨论度极高慨《 PUBG 》、再加上“中国上架保证”慨 Wegame，唔少人都睇好腾讯 2018 年肯定大赚，但实际情况居然唔系咁。
先讲《 PUBG 》，由于外挂问题极度严重，官方封外挂速度极慢，而同期推出慨《 Fortnite 》经过几次更新之后已经改到变成系统简单、节奏明快，加上封外挂力度更强，再配合适当慨合作如 Thanos 等，喺 2018 年《 Fortnite 》已经完胜《 PUBG 》。不过 PC 版唔得啫，腾讯一早出咗手机版啦，卖 game 唔 work 咪免费俾你玩引你课金啰！
虽然话《 PUBG 》出手机版就无嘥到个 title ，咁 PC 都要揾啲嘢出慨，腾讯其实真系好叻仔，倾到《 Monster Hunter : World 》慨中国独家代理，殊不知最终只系闹出一个更大慨笑话，上架两日都冇就下架，仲要系永久下架！下架原因究竟系中国政府所讲慨保护儿童眼睛，俾人挖到游戏原来系未完整审批就偷步上架，定系真系因为标榜“原汁原味”、“冇修正”而触动到政府？虽然真系无从考究，不过中国政府就藉住呢次事件作为导火线，进一步收紧游戏慨审批，暂停所有游戏慨收费申请，直到最近先重新批出申请。
腾讯喺 PC game 慨领域受到重挫不特止，吹风吹咗半年慨“最严实名制”喺 9 月正式出炉，虽然一众学生哥有办法“破解”，但始终都系有啲麻烦，当课金慨最大族群嫌麻烦玩少咗，课金量自然都会少，所以腾讯慨股价由年头跌到年尾，而因为政府年尾重新批出游戏慨收费申请先回升返少少。
Epic Games Store 开业危及 Steam 地位？
手执两大游戏引擎之一的 Unreal Engine 慨 Epic Games ，喺啱啱过去慨 12 月正式推出自家游戏平台，矛头直指 Steam ，对比 Steam 要收 30% 分成，佢只系收 12% ，已经吸引到唔少游戏开发商将旗下游戏摆上 Epic Games Store ，甚至已经有游戏例如《 World War Z 》已经讲明 PC 版会由 Epic Games Store 独占。另外，佢哋又公布 2019 年分阶段将旗下《 Fortnite 》用紧嗰套网络游戏工具免费推出，帮开发商搞好大规模网上对战呢部分，大大减轻成本，对游戏开发商当然好有吸引力。
讲到咁劲， Steam 咪收得皮？短时间内 Steam 肯定唔会受影响慨，首先 Epic Games Store 仲好新，无论系搜寻分类、甚或乎系统本身都有待改善，相信一时三刻唔会有好多游戏商够胆 all-in 。另外，玩家系懒慨，系会嫌麻烦慨，虽然明知俾一个平台独大唔系一件好事，但都系会宁愿可以一个平台搞掂，正正系因为呢种惰性，短时间内 Steam 肯定依然强势！不过 Epic Games Store 可以收咁少分成，背后肯定有一个更大计划，如果 Steam 冇适当慨应对，龙头地位迟早会受到动摇。
同场加映：豪赌 Diablo 手游失败，Blizzard 命不久矣？
今年其中一单“震撼弹”肯定系 Diablo 将会出手游，需知道大部分玩家对待家用机 game 同手机 game 慨睇法都好两极化，好多人都觉得手机 game 唔系 game 、只系不断迫人课金慨揾钱机器，虽然咁样谂真系会“一竹篙打一船人”，但无可否认 Diablo 玩家群里面真系好多呢类人，而明知自己玩家慨喜好都落咁慨决定真系同自杀冇分别。
另一边厢其实今年 Blizzard 持续炒人节流，就喺啱啱嗰个平安夜 Blizzard 爱尔兰客服中心就有 100 位员工接受咗名为“ Career Crossroads ”慨自愿离职计划，相信呢个情况会持续发生。有传搞到 Blizzard 咁多风多雨系因为母公司 Activision 慨介入愈嚟愈多，甚至财务部慨权力大到可以干涉游戏开发，究竟 Blizzard 最终可唔可以重返当日慨盛世，定会畀人玩烂呢？
2019 有咩展望？想知就睇细佬听日出慨 2019 上半年值得期待慨游戏啦！
延伸阅读
2018 年游戏界回顾 （上）“雷声大雨点小？”
